Lebt wol. Geben am ersten tag deß Christmonden, in dem Sibenden
Jare des gütigsten von Gott gecrönten grossen Kaiser Leon Regirung, das
ist nach Christi geburt 725.
[1]

Vnd hat also der Heilig Bonifatius bey Drey vnd Dreissig Jarn in
Teutschen Landen gewonet, darJnn gepredigt vnd vil Leuth Zu vnserm
heyligen glauben bracht, Sunderlich aber in vnserm Oster Francken Land
den Samen, so der Heilig Kilian durch sein Leere vnd Bluetvergiessen
geworffen vnd beZeugt hette, Aber von den Hitzigen Winden vnnd der
Ketzereyen vngewitter, auch altter Haidscher Abgötterey schier Außdört
worden ware, begossen vnd durch die gnadt Gottes wider Zu recht bracht.
Ob der Statt Wirtzburg bey dem Schloß, stunde ein haidnische Kirchen, darin
die Abgöttin Diana geert warde; die weihet S. Bonifatius in der Ehre
[3] der Lobwirdigen Junckfrauen Marie der Muetter Gottes, vnd ist die
erst Christlich Kirch gewest in disem Franckhen Landt. Siben Bisthumb
hat er in Teutschen Landen herumb vfgericht, vnd dieselben mit Jren gre-
[4] nitzen vleissig vnterschaiden, Nemlich Wirtzburg in Francken, Saltzburg,
Passau, Regenspurg vnd Freysingen in Bayrn, Aystet im Nordgau, vnd
Mersenburg in Duringen.


[5] Sant Bonifatius ist der Erst Ertzbischoff Zu Maintz gewest. Er hatt von
[6] den gaben vnd handraichungen seiner Predig Kinder, die herrlichen Clöstere
Fulde, Heresuelt vnd Kitzingen gebauet, vnd in den ersten Zwayen, mans
schule, Aber in dem dritten ein Junckhfraw Schule vfgericht, darJnn
der Fursten, Grauen herrn vnd vom Adel Kindere treulich vnd ehrlich
vferZogen worden sein.

[1]	39. Jahr nach dem tod Kilianj
[2]	Daß Ander Exemplar meldet das Bonifacius bey 74 Jahren in diesen Landen gewohnet pag(ina) 5b ist der vrtheil in schreiben, soll 34 heiß(en) dann in Jahr deß h(ei)l(s) 720 ist Er in Teutschland kommen v(nd) A(nno) C(hristi) 754 von den Frisen erschlagen word(en)
[3]	1.Kirchen in Francken so die Christen gehabt
[4]	Von S. Bonifacio 7 Bistumb vffgericht
[5]	1.Ertzbischoff Zu Maintz
[6]	3 Klöster gebauett