Verfurung deß Altten Veinds in dem Schatwen deß Todts Jrr ghen, Vnnd
gleich vnter dem Schein Christlichen lebens den Abgöttern Anhangen vnnd
dienen, Etliche aber bißher der erkhantnus nit gehabt, noch mit dem Wasser
deß Heyligen Tauffs gewaschen sein, gleich wie das vnuernunfftig Vihe Von
Jrem Schöpffer gar nichts wissen, haben wir Zu notwendiger erleuch-
tung beder thaile, Zu verkhundung deß Rechten glaubens wort, den Erwird-
igsten vnsern Bruder, Bischoff Bonifatien, Zaiger diß briefs, an dieselben
ortt, mit vleiß verordnet, das er Jnen nit allein mit predigung deß worts
deß hails, Zu dem ewigen leben fursehung thue, Sunder auch die Jhenigen,
so er villeicht von dem Pfade deß rechten glaubens geschritten erfaren, oder
aus listiger eingebung deß Teufels, Jrrig erfinden wurdt, wider Zu recht
pring, vnd durch sein vnterricht fure Zu dem vffar deß Hails, auch die
selben durch die Lere diß Bäbstlichen Stuels vnterweise vnd Lere, das sie
darinn verharren. Demselbigen sollet vnd wöllet Jr (Vermanen wir
durch die lieb vnsers herrn Jhesu Christi vnd seiner Apostel Lere) in allen
seinen handlungen tröstlich sein, ine auch in dem Namen Jhesu Christi an-
nemen, wie von seinen Jungern geschriben ist: wer euch annimbt, der nimbt
mich an. Ferrner wöllet Jne mit Notturfft Zu seinem weg mit essen
vnd trinckhen versehen, vnd weß er bedarfe, miltiglich mittailn, vf das durch
Zuthuung Gottes das guet vnd hailwirckhig gescheffte, so Jme beuolhen
ist, mit Ainmutiger Arbeit vnd geseliglichem willen Volbracht, Auch Jr die be-
lonung eurer Arbeit Zuempfahen, Verdienen mögt, vnd euch vmb bekherung
der Jrrenden, die vergeltung im Himel vfgeschriben werde. Vnd welcher
also disem diener Gottes, der Zu erleuchtung der haiden, von disem Heiligen
Bäbstlichem Stuel verordent ist, guetten willen vnd vnterschlaife erZaigen,
der wurt durch fürbit der Apostel Fursten verdienen die beywonung der
Heyligen vnd Marterer Jhesu Christi. Welcher aber, das wir nit begern,
sein furgenomen Arbeit, widerstrebant Zuuerhindern, sich vnterstehn wurdt
oder dem gescheffte, so Jme vnd seinen Nachkhomen, die in dieselbig Arbeit tretten,
beuolhen, entgegen sein (wirdt), der soll aus Göttlichem Vrthel mit dem Bande der
Verfluchung bestrickt werden, Vnd ewiger verdamnus vnterworffen sein.