[1] Ioannes .I. Als die Capittelherrn desz Domstiffts
Zu Wirtzburg, nach Dötlichem abgang Bischoff Gerhartten, Zusamen khamen, wider-
umb ain Neuen herrn Zu welen, vnd Jeder sein guetbeduncken vnnd mainung den
darZu verordneten, in sonderhait angeZaigt hette, fande sich in eröfnung der ge-
geben Stim(m)e, das Zwen aus Jnen die mainsten Stime, vnd ainer als vil hett Als der
[2] ander, Nemlich herr Johans von Eglofstain, Domprobst Zu Wirtzburg
vnd Capittel Domherr Zu Bamberg vnd Regenspurg, vnd dann Graue Rudolff
von Werthaim Domherr vnd Statthaltter deß Dechants Zu Wirtzburg, Wie-
wol nun Jederthail gern den Zu ainem herrn gehapt, den er gewelt hette, Vnd
sy aber bedachten, das nit bede sunder allein der ain aus Jnnen herr sein möchte,
[3] vnd dann Jnen auch vor augen gebildet warde, was mercklicher Zerruttung, vnd
vnrath dem Stifft Wirtzburg, seinem Lande vnd Leutten daraus erwachssen, das
Jre Vorfarn sich in der Wale mehr dann aines gespaltten, Vnd nit verglichen
hetten, fingen sy an Zwischen Jnen den beden Erweltten Zutaidigen, vnd vff
mitl Zugedencken, damit dem gantzen Stifft Zu guettem, der ain dem Andern
wiche vnd nachgebe, Aber Jr khainer woltte derselbig sein, der solches thette,
[4] Zum Letzten khamen sy die Erweltten bede, diser handlung Zu entlichem entschiede
vff Kunig Ruprechten, welchem er ain Zufal thun wurde, das als dann dersel-
big deß andern halben daran vnuerhindert Bischoff Zu Wirtzburg sein vnd bleib(en)
soltte, Das ist beschehen an Sant Elspeten tag, vnd warde daruf die sach eilend
[5] an Kunig Ruprechten bracht, der gabe sein Stime dem Domprobst, Lihe Jme
auch darauf die Regalia vnd Furstliche Lehen Zu Nurmberg am Freittag nach
Liechtmes, Jm Jar deß herrn .1401. Nach dem aber der Neu-
erweltt Bischof Johans ein gar geringe Barschafft in der Bischoflichen Cammer fande,
[6] Vnd doch sein notturfft eruordert, das er die beschehen wale Zu Rome vom Bapst be-
stettigen liese, suchte er seinen leiblichen bruder herrn Conraden von Eglof-
stain, den Maister Teutsch Ordens, in disen seinen nötten an, der Lihe Jme Siben-

---