Von Jtztgemeltter entborung vnd Krieg, hat derselben Zeitt
ainer Teutsche Reimen gemacht, Welche hernach im 1527. Jar durch den Truckh
ausgangen sein, Dieweil aber der Tichter fur Parthysch geacht werden möchte, vnd
dann das gedicht lang, an vil ortten mangelhaft, verkert vnd Jme selbst widerwer-
tig ist, Sunderlich in dem, da er meldung thut, das der Stette Volckh allenthalben,
3000 gewest sein, vnd doch anZaigt, das derselben 1200. erschlagen, 2000 gefang(en)
vnnd dannocht in der flucht vil entrunen sein etc. hab ich solchs den vbertries Zu-
uermeiden, nit herZu setzen wöllen, Wer es aber Zu lesen begert, der khan es sunst
alwegen wolbekhomen,

[1] Dieweil auch Bischoff Gerhart gar arm, vnd baren gelts,
damit er seine glaubiger ain wenig stillen, vnd sich selbs in seiner Kranckhait er-
haltten vnd hinbringen mochte, hoch notturfftig war, verkaufft er vf den ersten
Dinstag in der Vasten, deß obgemeltten 1400. Jars, Schlos vnd Statt Kunigs-
berg, so er vor Sechs Jarn vergangen, von Hertzog Schwantibern Zu Stettin er-
kaufft hette, herrn Friderichen, herrn Wilhelmen, vnd herrn Georgen gebrud(er)n,
Landgrauen in Duringen, vnd Marggrauen Zu Meissen, fur vnd vmb 19600 fl
behieltte Jme aber, seinen nachkhomen vnd Stiffte, die Zent, vnd die Gaistlichen
vnd Weltliche Lehen vnd gericht daselbst beuor,

So hette das Domcapittel 16000 fl. entlehet, vnd die furthar
Bischoue Gerhartten, Zu verfurung deß obgemeltten Kriegs wider sein Stette, dar-
gestreckt, darfur hatt Bischoff Johans von Eglofstain dem gemeltten Domcapittel
das Schlos, Statt vnd Ampt Carlburg vnd Carlstatt Jm Aanfang seiner Regir-
ung, nemlich am Freittag nach Sant Andressen tag deß obbestimpten .1400
mit allen seinen Dörffern, Leutten, Guettern, Nutzungen, gefellen, Zu vnd ein-
gehörungen eingesetzt vnd verschriben, Vnd sind dieselben Schlos, Statt vnd Ampt
allererst vf Sonttag nach Sant Lorentzen tag, Jm Jar deß herrn .1493. Als
die bey .93. Jarn in deß gemeltten Domcapitels handen vnd verwaltung gewesen,
[2] durch Bischoff Rudolphen von Schernberg an den Stifft wider gelöst worden,

---