Vom Adel aus Buchen, Hessen, vnd der Wederaw vmb besoldung vnd sunst
vf Jr seitten, eruorderten auch ein Zusatze von den Andern Stetten Jren Aydge-
nossen , Vf dem Lande, Zu Jnen, gewardent wann sy der Bischoff angreiffen
wurde, Nachdem aber der Hecker vnd Handwerck man Zu Wirtzburg
vnd der gemain Bauersman, so vf der burger eruorderung, wie obstet, vom Lande
hinein khomen waren, sich nunmer etlich tag von dem Wein vnd getraide, das
sy allenthalben bey den Gaistlichen suchten, fanden vnd mit gewalt namen, nach
lust gekröpfft, vnd deß geliebten Pfnauschs Jtzund gewonet hetten, aber durch solch
Jr Prassen die Kellere Versihen, vnd die bodenne Lehr worden waren, vnd sy
doch nit wisten, wann der Krieg ein end nemen, auch Bischoff Gerhart, der etwa
Vil Pferd geworben, Vfbracht, vnd in die Schlössere, Vnser Frauenberg, Gu-
tenberg, Werneck, Reichenberg, Brossoldsheim, in Jphouen, Dettelbach,
Ebenhausen vnd anderswa vnterbracht hette, Vnd souil Jme möglich, khain
Prouiand, Liferung oder Fuetterung in die Statt ghen liesse, khamen die Burg(er)e
Zu Wirtzburg vnd Jre Bundsgenossen vom Land zusamen, Zubedencken vnd Zu
Ratschlagen, wie sie ferrner vnterhaltung Zuwegen bringen möchten, Nun
ligt ain Dorff vf dem Schweinfurter Gay, Berchthaim genant, das hette
daZumal, wie noch Zu disen tagen ein weiten gebauten, vnd Vesten Kirchhof, dar-
ein etliche der Gaistlichen Zu Wirtzburg in disen Leuffen, mit vergunstigung
der Edelleute von Grumbach, denen bemelt Dorf Zustehet, Jr guldt vnd Zehendt
Getraid geflöhet hetten, Vnd wiewol die Stiffte Zu Wirtzburg, in den Stett(en)
Zu Schweinfurth, vnd Ochssenfurth grossere Chästen vnd mehr getraids hetten,
dannoch als die gedachten Burgere Zu Wirtzburg, vnd Jre Bundtsgenossen vnd
helffere, dieselbigen in Jren gewalt Zupringen, aus allerley vrsachen Zuschwer
vnd fur vnerheblich achteten, machten sy Jren Anschlag vf dem gemeltten Kirchof
Zu Berchthaim, Aber nachdem sy wol wisten, das die Gaistlichen etliche dahin