Leutte gehalten. Was auch derselben Zeit fur vngewitter oder Ander vnrath
[1] entstunde, Als wan grosser frost vnd ungewonliche Kheltte khame, Wann es
Zuvil Regnet, Zu lang Trucken plibe vnd durr wart, Wann der Rhein oder die
Thonaw Zu seich wurden, das die Veinde Leichtlich daruber khomen vnd schaden
thun kanten, die Früchte vff dem Velde schaden Namen, oder sich sterbleuffe
bey vnd vnter Inen eraugten, so legten sie die Vrsachen vnd schulde allein
vff die Christen als aberglaubige, Vnnutze vnd sündige leutte. die musten
sich dann darunter leiden, heimlich schmiegen vnd trucken, vnd dorfften
lange Zeit khein versamlung noch Kirchen haben. Dann die Kaisere liesen
in das gantz Reich der Römere Brieff vnd Beuelch außgeen, Wa Jemands
von seinem glauben abgefallen vnd Christen worden, Aber vff vermanung
davon nit abst[e]hen, Vnd widerkheren wolt, das man der kheinen dulden, sond(er)
Inen Ir leben vnd das guet nemen, oder Zum wenigsten auß dem Landt Jagen
sollte. Diß gebotte gefile den Kaiserischen Amptleutten vnd beuelchhabern
vff dem Lande, die der New geworden Christen guettere dardurch Zu Inen
brachten, seer wol, warde auch derwegen desto vleissiger gehandthabt. Aber
es halffe alles nit, Dann Je mer sie ernst vnd arbait fur wendeten, solches
von dem Heyligen Gaist entzundet feur Zu leschen vnd Zu dempffen, Je mer
die flam(m)en Zunamen vnd außbrachen. Darunter aber vil Heiligen Martren
Ir Bluedt seliglichen Vergossen haben. Vnd hat dise noth gewehret biß In
[2] das Jar deß herrn 319, Als Kayser Constantinus der groß vngeferlich
Zehen Jar Regirt hette. Derselbig widerrueffedt die obuerlautten gesetz
vnd gebotte, so seine vorfarn wider die Christen gemacht vnd ausgeen hetten
[3] lassen, gab Inen allenthalben Frid vnd gelaidt. Er versamelt auch vber
funff Jar darnach Das erst vnd groß Concilj der Christen, in der Statt Nicea
in Bithinien gelegen. Vnd von derselben Zeit an haben Vast alle Lendere
deß Römischen Kaiserthumbs, Sunderlich aber am Rhein vnd der Thonaw vf Jener
seitten den Christen glauben angenomen. Es sindt auch derselben ende
Vil Kirchen gepauet vnd Priester geweihet worden, Vnd die Christen Im Röm-
[4] ischen Reiche etliche Jare on sundere verfolgung, biß In Kayser Theodosy
dot, der Im Jar deß herrn 397 Zu Maylandt gestorben ist, in guettem
[5] Fride vnd Ruhe gestanden, vnd an Zeitlichen ehrn vnd guettern Zugenomen,
Aber dagegen an götlichen tugenden wider erkaltet, Vnd angefangen, die ge-
botte Gottes nachzulassen, vnd Zu vbertretten. Darumb auch Gott die Andern

[1]	Allerley Verfolgung Vnterdruckhung vndt Shmach musten die Christen leydn, vnter den heid nischen keysern, biß vff den keyser Constantin
[2]	Zur Zeit des keysers Constantin endet sich die Verfolgung der Christen
[3]	Vnndt nam der Christ liche Glaub sehr Zw.
[4]	Keyser Theodosius stirbet Jm Jar 397.
[5]	Nach Seinem todt nam den Christlich Glaub wider merckliches ab, das Vn- Christenthumb Zw.