[1] TEODORICVS, Dieterich deß geschlechts von Hohen-
berg an der Wehrn, ist nach absterben Bischoff Otten von Lobdeburg, durch die
herrn diß Domcapitels, Zu einem Bischoff vnd herrn gein Wirtzburg erwelt, vnd ge-
macht worden in dem Jar deß herrn .1223. Er hatt aber nit lenger Regiert,
vnd vorgestanden, dann ein ainigs Jare, Zwen Monden vnd VierZehen tag, Sein
elttern vnd derselben erben haben Jre Haußhalttung, vff dem Schloß Hohenberg
an der Wehrn gehabt. Der letzt desselben geschlechts, Diether gehaissen,
hatt khein Sun, sonder ein ainZeliche Dochter gehabt, mit namen Cristina, die
er einem herrn von Bickenbach, Conraden genant, verheyrat, Welcher mit
derselben seiner Hausfrauen, alle vnd Jede seines Schwehers (. so vnlang hernach
mit Todt abgangen ist .) Schlössere, Dörffere, Leutte vnd guetere, das ist
das gantz Ampt Hohenberg, geerbt, eingenomen, vnd sein Haußhalttung vber
den Speßhart gein Hohenberg Verruckt, daselbst gewonet hatt, vnd deß Stiffts
Wirtzburg Landses vnd Lehenman worden ist, Der Letzt seines Stamens
vnd Namens von Bickenbach, auch Conrad gehaissen, hatt bede seine Schlösere
[2] Hohenberg vnd Allesberg, sampt Jren Dörffern, Leutten, guettern, Zu
vnd eingehörungen, dem Stifft Wirtzburg, vmb etlich bar gelt, vnd ein Jerlich Leib-
gedinge Zukhauffen geben, vnd eingereumbt, Wie du dann hernach in Bischof Ru-
dolphen von Schernbergs leben, ferrner hören wurdest, vnd ist also das Ampt Hoh(en)-
berg erstlich an die herrn von Bickenbach, vnd furthar an den Stifft Wirtzburg komen,

Die gemeltten von Hohenberg, desz ehgenanten Bischoue Dietrichen

---