Dem Hochwirdigen, Dürchleüchtigen Fürsten vnd herrn, herrn Melchiorn,
Erweltem vnd bestettigten Zu Bischoffe zu Wirtzburg vnd Hertzogen Zu Franckhen,
meinem gnedigen herrn, Entbieth Ich mein vnderthenige vnd willige dienste mit allem
Vleis Zuuor. Gnediger herr, Von der Zale vnd Namen der Bischoffe zu Wirtz-
burg, auch wie lang die Regirt haben, seien etwa mancherley Büchlein gemacht word(en),
Vnter welchen das Jhenig, So weylandt Johannes Tritemius, Abbt Zu S. Jacob,
ausserhalb Wirtzburg gelegen, Zu den Schotten genant, zusamen bracht, das vleis-
sigts scheinet, Aber doch nit besser, Sonder etwas Irriger ist, dann die andern,
welches aus deme khomen, das er die Altten verzaichnus, so dauon geschriben, Aber
an manchen ortten mit den Namen, Jarzal, geschichten vnd Anderm Vngleich stimen,
wider zusamen reimen vnd verainen wöllen, In dem er etlichen mer, etlichen
wenigere Jare Zugeschrieben, dan sie Regirt haben; welches nit Cleine vrsach
geben; das er etlicher schreiber, die vor Ime gewest, Irrigen verzaichnus nach-
gangen, Vnnd drey Bischoue bene(n)nt vnd gesetzt hat, die nie gewest sein, Nemlich
Traghülfen, Hetzelin vnd Mecelin; Hinwider etlicher, die Zum tail orden-
lich erwelt, Zum tail Pöstulirt, oder sunst eruordert worden, davon auch et-
lich mit gewalt eingetrungen sein, Als Adelbert der Ander, Adelbert der
dritt, Berthold der erst, Conrad der Ander etc., Welche doch in den Fürstlichen
Standt vnd Regirung khamen, auch ain Zeitlang dar Inn gewest, gar nit gedacht,
sonder geschwigen hatt. Dieselben Büchlein alle, Souil ich dern bekhomen mogen,
hab Ich abgeschrieben, Volgents aus den Zeit- vnd geschichtschreiberen mercklich er-
weittert vnd gemeret, vnd mit allem vleis dahin gearbeit, die Zale, Namen,
Regirung, Handtlung vnd geschichte der bemelten Bischoffe Warhafftig vnd grunt-
lich heraus Zu Ziehen, Zuuergleichen vnd souil muglich gewest, lautter Zumachen.
DarZu mir dann grosse steur vnd furtterung gethan haben die Altten Treffen-
liche vnd herliche Priuilegi, Freyhaitten, Handtvesten, Stifftung, Wideme, be-
gabung, Vertrege vnd Brifliche besigelte Vrkhundt, die Ich in E. F. G.
Vnd derselben Thomcapitels Schatzbeheltnussen, auch bey etlichen Andern
mehr Stifften vnd Clösteren diß Loblichen Bisthumbs gesehen, gelesen, Abge-
Zaichet, Zusamen Zogen vnd in Ordnung bracht, Auch darunter vil Zeit vnd nit
wenig muhe vnd Arbeit vfgewendt hab. Ob nun das Werckh, das ist, diß mein
Buchlein solcher gehabten muhe vnd Arbeit Villeicht bey ainem Jeden nit gleich nach
wirdig geacht wurde, das solle mich nit sehr khomern, dann ich es auch nit fur
den gemeinen Leser, Sunder allein fur E. F. G. vnd meine gnedige herrn deß Thomb-