[1] CONRADVS primus, Conrad der erst disz namens,
ein geborner Frey oder herr von Rabenspurg, ist in die Regirung deß
Stiffts Wirtzburg getretten, Jm Jar deß herrn 1198. vnd darin pliben
Drey Jar, Zehen Monden vnd etlich tage,

[2] Graue Dietbald Zu Vohburg, Marggraue Zu Chamb Jn Bairn
der die Drey Clöstere Reichenbach, Münchsmünster Vnd Waldsass(en)
gestifft, hatt mit seiner Hausfrauen Adelhaiden, Hertzogin aus Poln
Zwen Sün vnd Vier Döchter ertZeugt, aine aus den Döchtern Adel genant, ward
Kaiser Friderichen dem ersten vermahlet, aber volgender Zeit, darumb das sie
Jme Kaiser Friderichen, mit naher blutsip Verwant, durch Bischoff Diethelmen
Zu Costentz mit vrtl vnd recht wider von Jme geschaiden, Nun hette der
Kaiser ein Frenckischen herrn am Hoff Diethen genant, der was aus dem ge-
schlecht der Von Rabenspurg, die nit weit von Wirtzburg in dem Schloß Rab(en)-
sperg Jre wonung hetten, welcher Jm etlich Jar hero, treulich, vleissig, vnd
Zu gefallen, wolgedient, den er auch nie anders, dann Adelich, from, Manlich,
vnd redlich gespurt hette, Dieweil er dann gemelter seiner Muhmen
vnd abgethailten gemahle, Frauen Adeln, vonVohburg sehr gunstig ware, gab
er dieselbig vorgenantem herrn Dieten, von Rabenspurg Zu der ehe, Die bede
Zeugeten neben andern Kinden Ain Sune Conraten genant, den hielten
sy vleissig Zur Schule, Vnd als der an Jarn, Lere vnd guten tugenden mergk-
lich Zuname vnd wuchse, gaben sie Jne Kayser Friderichen, seinem Öheim, Zw
ainem Diener, von dem er mit reden, schicken, vnd sonst in teglichen gemainen
Rethen vil gebraucht, Auch so bered, Kündig vnd außrichtig warde, das er Jne

---