Liß vor, wig wol, darnach vrtail,
Ob du verdacht wilt meiden,
Recht wie ein Kauffman, der sieht fail
Edelstein, Wurtz vnd Seiden.
Nit balt er kauft, noch laufft daruon,
Zuuor er sie besichte,
Failscht darnach erst, ob er mög thon
Richtigen Kauff mit ichte.
In solcher weis ein ieder soll
Erstlich die sach recht wegen,
So kan er alsdann richten woll,
Vil ist daran gelegen.
Ob aber der, so richten will
Nit hat verstand, so felte
Mit macht das recht ins widerspil
Etwan gunst, neid vnd gelte
Recht vnrecht machen gar vil mal.
Gleichhait dein meß sein lasse:
Eben, rauch, eng, weit, brait vnd schmal,
Tieff, seich, groß, clain, recht masse
Herlich es dir antzaigen thut.

Ain lang Zeit ist vergangen,
In der haben groß lust vnd mut
Mein tumbes hertz gefangen,
Heraus zugeben an den tag
Ain werckh schlecht, vngeschmuckt,
Taub, schal, loß, blos, welckh, lam, träg, zag,
Dunckel, hinckent, zerstucket.
Jedoch darf ich sagen furwar,
Solch werckh hat mich gestanden,
bey tag vnd nacht groß arbeit zwar
Von sin, gesicht vnd handen.
Clain ist mein witz, vernunfft gering,
Hab doch kain muhe vmbgangen,
Glaub, ob nit iedem alle ding
Erspriessen nach verlangen,
Mocht doch ainer zufinden sein,
An dem ich danckh bejage.
Clain ehr erhebt der schilt das mein,
Herfur er bessers trage.
Es zaiget an ain furwitz gail
Trotzlich frembd werck zerschneiden,